文／吳秀媛，新竹縣湖口鄉人，客家文化志工（海陸腔）
𠊎係新竹縣湖口鄉人，自細到大戴湖口，上上下下，總係坐火車。𠊎坐火車去新竹讀書、坐火車去山崎上班；坐火車去台北上班、坐火車去…。人生盡生趣，走上走下，毋知行過幾多个火車頭，心肝肚係斯有一隻𠊎永久想念个火車頭，𠊎永永遠遠毋會毋記得个新湖口頭擺个火車頭。
𠊎係食鐵路飯大个湖口人，𠊎屋下家族摎鄰舍有當多人在鐵道部上班；鐵道部，就係今這下个鐵路局，鐵路局像係𠊎屋下。
新湖口頭擺个老火車頭，係盡靚个日本式建築。𠊎細細時節聽阿公講，在清朝時代，鐵路路線原本係對楊梅到大湖口，再過經過紅毛田到老湖口。民國28年該量時，火車還係「火車嫲燒石炭」个時代，因為這條鐵路路線盡嶇，鐵路路基又毋穩，見擺到這，火車嫲斯拉毋上來，所以日本政府斯決定摎鐵路路線對老湖口遷著新湖口，同時在新湖口火車頭脣起歸排个鐵路員工宿舍，當中門牌95、97號係站長、副站長宿舍，另外還有監工房…
𠊎正經有盡多年無坐火車轉湖口咧，該晡日，𠊎當工轉去看𠊎日合夜發夢斯會想著、陪𠊎行過後生時節个湖口火車頭；湖口火車頭變淨淨咧！好得好得！ 95、97號站長，副站長宿舍、監工房…還在。
湖口又落水咧！淅瀝淅瀝嘩啦嘩啦又係落水天，毋管雨水係仰般分人無結無煞，鐵路局台北工務段湖口監工房摎脣頭个日本式站長老宿舍，這差毋多會屙忒塌下來个日本式建築，像一個掌門个老人家，對等長槓長槓个月台，對等一枋枋駛等過去个車枋，對等來來去去湖口个有緣人，還係嘀嘀咄咄講出台鐵自劉銘傳鐵道到這下唯一還保存个大湖口車頭个老故事。
𠊎企在火車頭日本式站長老宿舍摎監工房脣頭，𠊎想著頭擺火車頭對湖口老街遷徙到新湖口，新湖口个湖口火車頭帶動湖口人文經濟个發展…，哦！原來新湖口个湖口火車頭做得講係南來北往个交通旅遊中心哦！𠊎續等又想著︰係講該日本式站長老宿舍摎監工房做得整修起來，分佢兜做得竳竳在該企等，變成一隻故事館、文化館毋知幾好？係講恁樣，該湖口火車頭斯會變成湖口鄉个一隻新地標，一隻當竳線、當得人惜个文化廣場…
離開湖口家鄉有好多年咧，𠊎想念𠊎个湖口老家鄉，𠊎想念畜𠊎到大、分𠊎有飯好食个湖口青春火車頭。
華語
我是新竹縣湖口鄉人，從小到大住在湖口，出出入入，總是坐火車。我坐火車去新竹讀書、坐火車去新豐上班；坐火車去台北上班、坐火車去…。人生真有趣，跑上跑下，不知經過多少火車站，心裡頭卻只有一個我永久想念的火車站，我永永遠遠不會忘記的新湖口從前的火車站。
我是吃鐵路飯長大的湖口人，我家家族和鄰居有很多人在鐵道部上班；鐵道部，就是現在的鐵路局，鐵路局像我的家。
新湖口昔日的老火車站，是個漂亮的日式建築。幼年，我曾聽爺爺說，在清朝時代，鐵路路線原本是從楊梅到大湖口，經過紅毛田到老湖口。民國28年，火車還是「火車頭燒煤炭」的時代，因為這條鐵路路線很陡，鐵路路基又不穩，每到這裡，火車頭往往拉不上來，所以日本政府就決定將鐵路路線從老湖口遷移到新湖口，同時在新湖口火車站旁建了一整排的鐵路員工宿舍；當中門牌95、97號是站長、副站長宿舍，另外還有監工房…
我真的有好多年沒坐火車回湖口了，那天，我特地回去看我日思夜想、陪我走過年輕時的湖口火車站；湖口火車站已完全改了樣了！千幸萬幸！ 95、97號站長，副站長宿舍、監工房…還在。
湖口又下雨啦！淅瀝淅瀝嘩啦嘩啦又是下雨天，不管雨水是如何讓人不知所措，鐵路局台北工務段湖口監工房和旁邊的日式站長老宿舍，這幾乎將塌下來的日式建築，像一個看門的老人家，對著落落長的月台，對著一班班開過去的車班，對著來來往往湖口的有緣人，仍是念念有詞地述說台鐵自劉銘傳鐵道到現在唯一還保存的大湖口車站的老故事。
我站在火車站日式站長老宿舍和監工房旁邊，我想著從前火車站從湖口老街遷徙到新湖口，新湖口的湖口火車頭帶動湖口人文經濟个發展…，哦！原來新湖口的湖口火車站可說是南來北往的交通旅遊中心哦！我接著又想︰如果那日式站長老宿舍和監工房可以整修起來，讓他們可以在那兒挺立，變成一隻故事館、文化館不知有多好？如果這樣，那麼湖口火車站就會變成湖口鄉的一個新地標，一個很亮麗、人見人愛的文化廣場…
離開湖口家鄉有好多年了，我想念我的湖口老家鄉，我想念養我到大、讓我有飯可吃的湖口青春火車站。