文／曾馨儀，北科附工文語支援教師，客語績優薪傳師，係苗栗人，這下歇在桃園市（四縣腔）
咕咕～咕，咕咕～咕～，報時鳥大雞公在該喊䟘床哩！東片魚肚白个雲囥等金色光，想愛出來跳舞吔！
柔柔个風吹過面頰卵，感覺特別清涼。青禾穀个草香味一陣一陣鑽入鼻空，分人歸身仔鬆爽。一大早陪阿爸行行看看，看著青黃青黃个禾串，阿爸就開始講古哩！
阿爸講：想着佢兜後生時節，蒔田割禾，全全愛靠人工，用換工互相𢯭手个方式來做農事，愛蒔田割禾該下，日仔還吂到，就愛先去同隔壁鄰舍先問便講好勢。
蒔田日仔到咧！天吂光阿爸阿姆就會摎秧仔，先㧡到田脣項放好。等蒔田个人落田該時，正好勢摎秧仔放在秧盆項，該秧盆摎這下人，拿來浸腳个樹仔腳桶，形仔會共樣咧，爭差在秧盆較闊較淺。秧盆就像細細个青船，在水面項漂來漂去，田坵肚逐儕人就磬頭拗腰。用秧笐（註1）摎秧仔一撮一撮蒔落去水田項，加上滿田个腳跡印一窟一窟（註2）仔，日頭照映水光反射个倒影，還像一幅靚靚个圖畫哪。這下愐想起來，嘴角還會笑到翹尾。
吾爸講：「人勤地獻寶，人懶地生草」，「仰仔耕耘，就仰仔收成」，耕田人逐日愛巡田水，抽水放水，掖肥還愛挲草。成時，暗晡頭還愛捉老鼠，老鼠仔會打窿，田水嗄漏忒吔，恁樣就會輒輒缺水，影響禾仔个生長。等到禾仔打胎該央時，到黄熟這段時間，還愛逐鳥仔。阿爸做草人仔摎佢著衫褲，像假人企在田中央掌等嚇鳥仔，有時乜會打紙炮仔來逐鳥仔。佢講係無就會了伙食咧！
割禾做緊工个時節，日頭炎又烈，打早就愛先摎禾仔割下來放一排一排仔，等打穀機來該時正赴得掣。穀包車轉大禾埕，還愛篩過，耙到一壟一壟（註3）仔分日頭晒。成時係堵著打風馳，該一家大細都愛煞煞𢯭手收穀，正毋會涿著雨。成時一晝邊收收晒晒幾下輪，正經會分天時搣死忒，故所，阿爸長透講：耕種人看天食飯，一息就毋會差。
這時，在吾腦膈度浮現出，臨暗仔山背黄霞黃霞个斜陽照在禾埕，摎一堆堆金黄个穀堆相映，正經有罅餳人。阿爸同阿姆坐在禾埕脣項敨涼个身影，看著佢兜額頭淰淰个汗粒仔，同面項滿足幸福个表情。黏時，該幅「農家風情畫」分𠊎感覺，農家人个辛苦有價值咧！
（註1）秧笐：音iongˊgongˇ；插秧的器具。
（註2）一窟一窟：音idˋ fudˋ idˋ fudˋ；一個窪地接著一個窪地。
（註3）一壟一壟：音idˋ liungˇ idˋ liungˇ；突出排列整齊。
華語
咕咕～咕，咕咕～咕～，報時鳥大公雞在那裏叫喊該起床囉！東邊魚肚白的雲中藏著金色光束，跳躍舞動著！
柔柔的風吹拂著臉頰，感覺特別的清涼。稻穗的香氣一陣一陣飄入鼻尖，給人渾身輕鬆爽朗。清晨陪爸爸走走看看，看到青黃色的穀串，爸爸就開始說起故事了！
爸爸說：想著他們年輕的時候，插秧割稻子，全部都需要靠人手工完成，當時是以工換工互相幫忙的方式來做農事，要插秧割稻子的時候，時間還沒到，就要先去跟隔壁鄰舍的人先預約做準備。
插秧的日子到了！天還未亮，爸爸和媽媽就會將秧苗，先挑到田邊放好。等插秧的人要下田時，才方便把秧苗放入秧盆裡，那秧盆跟現代的人，拿來泡腳的木桶，形狀差不多，差別在於秧盆比較大與淺。秧盆好像青色的小船，在水面上漂來漂去，田裡的每個人都低頭彎腰。用插秧筒把秧苗一撮一撮插入水田中，整片田裡滿滿的腳印子，太陽照映在田水反射的倒影，好像一幅漂亮的風景畫啊。現在懷想起來，還會裂開嘴角微笑。
爸爸說:「人勤地獻寶，人懶地生草」，「怎麼耕耘，就怎麼收穫」，種田人每日都要巡顧田水，灌溉放水，灑肥還要除草。有時，夜間還要捉田鼠，田鼠會打地穿洞，田水就畫漏光了，這樣會常常缺水，影響秧苗稻子的生長。等到稻穀抽穗時，到熟黃的這段時間，還要趕鳥。爸爸會紮稻草人讓他穿上衣服，像假人站在田中央看顧著來嚇鳥，有時也會放鞭炮來趕鳥。他說:若是不這麼做，就會被鳥糟蹋了糧食！
割稻子農忙的時候，太陽炙熱，一大早就要先將稻穀割下來放一排一排的，等打穀機來的時候才來得及。一包一包的稻穀運回晒穀場，還要過篩，耙成一列一列的晒太陽。有時會遇到晴時偶陣雨，那時，一家大小就要快快來幫忙收稻穀，才不會淋到雨。有時一上午收收晒晒好幾遍，真的會給天公爺搞死了，所以，爸爸常常說：種田人靠天吃飯，一點都不差。
這時，在我的腦海中浮現，傍晚山邊黃澄澄的夕陽灑在晒穀場上，與一堆堆金黄色的穀山相映，真的好迷人。爸爸與媽媽比肩坐在晒穀場邊上搧涼的身影，看著他們額頭上滿滿的汗珠，還有臉上滿足幸福的表情。頓時，那幅「農家風情畫」，讓我感到農家人的辛苦有價值了！