文／邱鴻春，客語文薪傳師，桃園楊梅伯公岡客家人（海陸腔）
一溜仔來聽人講
團魚咬著盡冤枉
等佢放嘴響雷公
無影無跡愛杖賞
頭擺做細人最希望有人戽陂塘，就做得拿等面盆去捉鰗鰍仔、蝦公仔、拈蚢蟜仔，下把毋堵好還會有看著較值錢个團魚，從細就聽大人講，團魚當惡愛特別好先，毋比龜仔恁溫馴，團魚不管哪量時，就係頭探探毋驚人，係偎兼想愛捉佢，定著愛特別細義，一下無好勢，手指頭就會分佢咬著，愛等到響雷公正會放，該就死無命咧！還識聽人講，直接摎頭那剁下來，還係緪緪咬等，可見這就係佢个本能自然反應，有危險个時節就會咬人咬核核。
前幾日有一息衖縫時間，就利用這機會去莊下遶遶仔，車仔停在一位大水溝脣，山頂流下來係鮮鮮个水，形成一條白雪雪个細水沖，好聽又好看，空氣清新心情特別好。
遠遠行來一位老阿伯，𠊎主動行前去摎佢頷頭打招呼，佢用四縣腔問愛做麼个？遽遽摎佢相借問，自我紹介一下，佢乜當客氣摎𠊎譫哆打嘴鼓，原來佢就係戴頭前該間大屋个阿叔，姓李今年八十一歲，屋下係講長樂腔，包尾互相講海陸腔。兩儕人看等大溝肚个水，阿叔講，這大溝肚頭擺當多蜆仔、田螺、蝦公仔這兜，下把仔還會有塘虱、鱶公、鱧仔、團魚，這下就全看毋著咧，就伸較耐命个石螺摎禾花仔！還過，莫看該水恁鮮恁淨，還係做毋得食，因為山頂有人種菜，可能會有農藥飛著，食著就無結煞咧！
既然阿叔有講著團魚，就順續問佢識分團魚咬著無？吂知佢正經講有，係毋係有等響雷公正放嘴、抑係直接剁頭？佢講：「等響雷公係淆漦个，毋過咬等當痛毋放係正經个，𠊎就遽遽摎佢放在地泥下，分佢四腳貼地，恬恬忍等一下毋好停動，佢感覺無危險性，就黏時放嘴走忒咧，有這擺經驗後，定著毋會分佢咬第二擺。」，阿叔還講：「假使當時係在水竇肚，乜做得摎佢放在水竇肚，共樣忍等恬恬一下，一下仔就放嘴泅走咧。」
由此可見，大人係愛強調團魚當惡，毋好話著佢盡生趣好搞就嗟醢嗟醢（註），若係無提無防就會分佢咬著。乜係教後生人出門讀書、做頭路，摎人交摎目珠愛金愛細義，老古人言講个：「害人之心不可有，防人之心不可無」。就係這個道理，大家共勉。
註釋
（註）嗟醢嗟醢（zia goi zia goi）：不起眼不當一回事，也有說「嗟嗟仔」。
華語
一直以來聽人講
給鱉咬到很冤枉
要牠鬆口等打雷
胡言亂語棍杖賞
以前小時候很期待有人池塘放水抓魚，就可以拿著臉盆去捉泥鰍、蝦子、撿河蚌，有時候還會看到比較值錢的鱉，從小就聽大人說，鱉很兇要特別小心，不像烏龜那麼溫馴，鱉在任何時間，都是頭伸出來不怕人，如果靠近想捉牠，一定要特別小心，一下沒注意，手指頭就會給牠咬到，要等到打雷才會鬆口，那就完蛋了！還曾聽說，直接把頭剁下來，還是緊緊的咬著，可見這就是牠的本能自然反應，有危險的時候就會咬人咬緊緊。
前幾天有一點空檔時間，就利用這機會去鄉下走一走，車子停在一處大水溝旁，山上流下來是清澈的水，形成一條雪白的瀑布，好聽又好看，空氣清新心情特別好。
遠遠走來一位老阿伯，我主動走上前去向他點頭打招呼，他用四縣腔問要做什麼？趕快和他問好，並自我介紹一下，他就很客氣和我聊天，原來他就是住在前面那間大房子的叔叔，姓李今年八十一歲，家裡是講長樂腔，後來互相講海陸腔。兩個人看著大水溝裡的水，叔叔說，這大水溝裡面以前很多蛤蜊、田螺、蝦子這些，有時候還會有塘虱、七星鱧、斑鱧、鱉，現在都看不到了，就剩適應力比較強的石螺和蚊子魚！還有，不要認為那水很乾淨清澈，還是不能飲用，因為山上有人種菜，可能會有農藥濺到，誤食就麻煩了！
既然叔叔有說到鱉，就順便問他曾給鱉咬到嗎？沒想到他真的有過，是不是等打雷才鬆口、或是直接剁頭？他說等打雷是騙人的，不過被咬著很痛不放是真的，我就趕快把牠放在地上，給牠四腳著地，靜靜忍耐一下都不要動，牠覺得沒有危險了，就馬上鬆口爬走了，有這次經驗後，一定不會給牠咬第二次，叔叔還說，假使當時是在水裡面，也可以把牠放在水裡，同樣忍耐一下不要動，一下子就鬆口游走了。
由此可見，大人是要強調鱉很凶悍，不要以為牠很有趣好玩，而不當一回事，若是完全沒防備就會給牠咬到。也是教導年輕人出門求學、工作，和人交往眼光要好要注意，古人云：害人之心不可有，防人之心不可無。就是這個道理，大家共勉之。