文／呂秋蓉，桃園市平鎮區人，客語薪傳師，戴平鎮。感謝邱鴻春先生指導客語寫作（四縣腔）
十月初，中秋連假，原旦應該係全家團圓、看月光食月餅焙肉个時節，毋過妹仔去花蓮做砂鐐志工，該央時花蓮受著當嚴重災害，新聞頂畫面既經分人試著當痛心，佢親身看著現場，正經一隻字－慘，眼前係一片橫忒个屋舍狼離狼犁、崩忒裂忒个路面、滿地泥濫膏糜，空氣肚飄等無力个沉重。
最分人艱苦个係災民兜个眼神，係著驚、無助摎悲傷个面色，像歸隻世界都矺在佢兜心肝肚樣，有人家園無了、親人無忒，佢兜眼茫鼻花又無奈，正經係人講个水火無情，心肝肚在該滴血，目汁也毋聽話流下來，總希望，自家做得盡一息仔力，盡量去𢯭手，就算正鏟走一堆瓦析、搬走一桶泥水，也做得分佢兜早一息仔，恢復之前平凡个生活。
在大日頭下整理現場，汗水汀汀流，砂鐐一下去，全係又濕又重个泥矻，無一下仔手就起膘了，腰仔也伸毋直，毋過看著邊脣个志工一個個都恬恬堅持，佢也毋敢喊𤸁，最感動个係，有一個受災戶阿姨，佢自家麼个都無了，還笑等緊對志工講「承蒙」，正經係當溫暖个畫面，這兜砂鐐志工做到當甘願當歡喜。
兩日下來，妹仔看著佢一生人盡多个難忘畫面，有一個阿公在瓦析堆肚揙尋相片，想愛尋轉一段回憶，一個阿姆揇等分濫泥膏著烏疏疏个布人公仔，噭到心會裂忒樣，還有一個細阿哥仔問：阿姊阿姊，𠊎兜還做得轉去無？該聲音輕輕仔，嗄像一支針深深刺入心肝肚，佢摎自家講，𫣆兜做毋得單淨同情佢兜，用實際行動去幫助佢兜正係著个。
轉到屋下後，佢心肝頭一直無辦法平靜下來。這擺个志工經驗，分妹仔深深體會著將心比心个意義。看著別儕艱苦，想轉來看，假使分𫣆俚堵著，該愛仰結煞？恁樣个想法，分妹仔更加曉得感恩，原來這下有个所有東西，有屋仔、親人、朋友、安全个生活，都係當值得珍惜个幸福。
人問妹仔，該兩日會艱苦無？佢笑等講：身體雖然艱苦，但係心肝還較感動，該毋係一到普通个旅程，「人無好過餐，就像𠊎無好過餐；人有痛難，就像𠊎有痛難」，分佢瞭解，幸福從來毋係應當个，愛學會珍惜、愛曉得感恩。
學著付出係一種本能，在你看著有需要幫助个時節，就會當自然伸出手來𢯭手，這係世間上最靚最正向个力量，佢探頭看等月光，總會想起花蓮該兩日。雖然滿哪仔係傷痕，毋過看著更加多个希望，因為人還在、心還在、溫情還在，重建就定著無問題。
華語
十月初，中秋連假，原本應該是闔家團圓、賞月吃月餅烤肉的時候，不過女兒去花蓮當鏟子志工，那時花蓮受到嚴重災情，新聞播報畫面已經讓人心痛，她親眼目睹現場，真的是一個字－慘，眼前一片狼藉屋舍倒塌、崩裂的路面，滿地爛泥，空氣中飄著無力的沉重。
最讓人難過的是災民們的眼神，驚嚇、無助和悲傷的面容，像整個世界都壓在他們心裡，有人家園沒了、親人沒了，他們眼神無助又無奈，真的是水火無情，心在滴血，眼淚也不聽話流下來，總希望，自己可以盡一點心力，盡量去幫忙，就算只鏟掉一堆瓦礫、搬走一桶泥漿，也可以讓他們早一些，恢復之前平凡生活。
在大太陽下整理現場，汗流浹背，鏟子一下去，都是又濕又重的泥團，不一會手就起泡了，腰也伸不直，但看到身旁志工一個個都默默的堅持著，她也不敢喊累，最感動的是，有一位受災戶阿姨，自己什麼都沒了，還笑著對志工們說「謝謝」，真溫馨的畫面，這些志工們歡喜做甘願受很開心。
兩天下來，女兒看到一生中最多難忘的畫面，有一位爺爺在瓦礫堆中翻找照片，想要找回一段回憶，一位媽媽抱著給爛泥巴沾到髒兮兮的布娃娃，哭到撕心裂肺，還有一小男孩問：姊姊 姊姊，我們還能回去嗎？那聲音輕輕的，卻像一支針深深扎在我心裡，她和自己說，我們不能只同情他們，要用實際行動去幫助他們才對。
回到家後，她心裡頭一直無法平靜下來。這次的志工經驗，女兒深深體會到將心比心的意義。看別人痛苦，反之，若發生在我們身上，該怎麼辦呢？這樣的想法，讓女兒更懂得感恩，原來現在所擁有的一切，房子、親人、朋友，安全的生活，都是值得珍惜的幸福。
有人問女兒，那兩天會辛苦嗎？她笑著說：身體疲累，但心更感動，那不是一趟普通的旅程，「人饑己饑，人溺己溺」，讓她了解，幸福從來不是理所當然的，要學會珍惜，要學會感恩。
學到付出是一種本能，在你看到有人需要幫助的時候，就會自然伸出雙手來，這是世界上最美最正向的力量，她抬頭看著月亮，總會想起花蓮那兩天。雖然是到處傷痕累累，不過看到了更多的希望，因為只要人還在、心還在、溫情還在，重建就一定沒問題。