文／黃善美，客語薪傳師，桃園新屋客家人，這下還戴在桃園新屋（海陸腔）
有一隻禮拜日个下晝手機響起，電話該頭傳來講：「鷂婆山下个紅花打當結，歸欉打到淰淰，你愛無？」，看澎哥傳來个相片，該紅花像一串串過年時拜天公个紙炮仔，紅啾啾正式還靚。有一擺，請教一個大姊，佢講「洛神花」个客家話係講紅花。
該日暗夜，暢靂靂仔駛車來到約好个位所，澎哥一打開車仔後斗講：「最大包該包就係分你个。」𠊎回答講：「恁大包，仰得你个人情過！」轉屋路項心肝肚緊想，愛做紅花酒抑係果醬，還係愛晒燥泡茶乜盡好，做這兜東西對自家來講係小可事情，因為自家有拿著乙級个西點證照，最尾就順自家个意做果醬。
轉到屋下，遽遽愛摎核擇忒，阿姆哀！正經無恁該，人講：「水大好行船，人多好做事。」𠊎斯單人獨馬在該擇，一時半刻尋毋著遮骨摎核擇忒，老公看著無結無煞，就用剪刀順蒂頭𫟧一圈擇忒，解決𠊎个問題咧，擇下來个核當像著等芭蕾舞衫，還得人惜，倈仔講乜當像一隻靚靚个花禁指。
紅花擇好愛用水洗加幾遍，因為無打藥仔盡多細蟲仔趖上趖下，再來就準備好一隻大鑊仔，先放落紅花，過摎準備好个赤砂、冰糖、鹽放落去，毋使摻水，花摎糖个比例係七比三，合自家个口味就好，開始煮个時節，火毋好昶猛，建議第一擺煮儕，先用文火煮出水，火正慢慢加大一息仔，一片煮一片愛用鑊鏟撩撩啊，差毋多愛二十零分鐘時間，起鑊遽遽裝落淨俐个盎仔肚，蓋仔弇好倒汫放冷，恁樣就做得保存較久。
煮好个紅花果醬，黏時就泡一杯分家娘食，加兜蜂糖落去，就像人講个有戀愛个感覺，家娘啉了後阿腦講：還係自家煮个較合味。人講洛神花个核有當多膠質，所以煮个時節愛摻水落去，水个量愛比核多加一倍， 糖个比例就自家測，合味就好，𠊎就好酸丟丟這一味，緊煮緊看等花个核，在水紅色个鑊肚緊跳舞，就想著奧運選手在水兜肚跳芭蕾舞共樣，還餳人个畫面。
客家人對大自然儆惜、惜物个精神，還有老祖公个智慧，將紅花歸隻變做寶，定著愛摎這項文化、客家精神傳承下去，行出靚靚个客家路，就毋單淨係會講客語定定。
華語
有一個禮拜天的下午手機響起，電話那頭傳來說：「老鷹山下的落神花開得很茂盛，整棵果實滿滿，你要嗎？」，看澎哥傳來的相片，洛神花就像一串串過年時拜天公的鞭炮，紅冬冬真漂亮。有一次，請教一位大姊，她說「洛神花」的客家話叫紅花。
那天晚上，很開心的開車到約定的地方，澎哥一打開後車箱說：最大包那包就係是你的，我回答說：這麼大包，你的人情難還，回家路上內心在想，要做洛神花酒還是果醬，或是晒乾泡茶也很好，做這些東西對自己來說是小事一椿，因為自家已拿到乙級的烘焙證照，最順就順自己的意思做果醬。
回到家裡，馬上準備將籽挑除，天啊！真的不容易，人說：水大船就行駛順又快，人多三兩下就把事辦好。自己單槍匹馬一人在挑籽，一時之間找不到傘架將籽挑除，先生看了也替我著急，就用剪刀順著蒂頭轉一圈挑除，解決我的問題了，挑除的籽就像穿著芭蕾舞衣，好可愛，兒子說也很像一指漂亮的花戒指。
洛神花挑好要用水多洗幾次，因為沒有撒農藥有很多小蟲爬上爬下，接下來準備好一個大炒菜鍋，先放入洛神花，接著將準備好的二砂、冰糖、鹽放入，不要加水，花跟糖的比例是七比三，適合自己的口味就可以，開始煮的時候，不要使用大火，建議第一次烹煮者，先用小火煮出汁，火才慢慢加大一些，一邊煮一邊要用鍋鏟翻動像炒菜一樣，差不多二十分鐘左右，起鍋馬上裝入乾淨的罐子裡，蓋子蓋好倒放至冷却，這樣可以延長保存時間。
煮好的洛神花果醬，隨手就泡一杯給婆婆喝，加了一些蜂蜜，口感就像人說的有戀愛滋味，婆婆一直讚美說：還是自煮的較對味。人說洛神花的籽有很多的膠質，所以煮的時候要加水進去，水的重量要比籽多加一倍， 糖的比例依個人調整，對味就好，我就喜歡酸溜溜這一味，邊煮邊看著花个籽，在粉紅色的鍋裡邊跳舞，就想到奧運選手在水中跳芭蕾舞一樣，好吸引人的畫面。客家人對大自然愛物、惜物的精神及老祖先的智慧，將紅花整棵都變成寶，除了會說客語之外，也一定要將這項文化、客家精神傳承下去，邁向一條亮麗的客家之路。