文／温志平，銀行行員，新埔客家人，現居新竹縣竹北市（海陸腔）
人生就像一齣戲，逐個人都有自家个劇本，乜都係自家劇本裡背个主角。在自家个人生舞台頂，想愛仰般表演就仰般表演，因爲自家係主角，乜係導演。
世上無麽儕个人生劇本係「完美」个。有錢人有有錢人个煩惱，窮苦人乜有窮苦人个快樂，所以毋使欽羨別儕个劇本比自家好。逐個人个人生劇本毋係一出世就寫好个，劇本个內容係會跈等人生煞猛摎堅持个程度緊在該改變。𫣆俚無好選擇自家个出世，毋過𫣆俚做得決定自家个未來，因為自家个人生劇本自家做主，想愛未來个人生精彩又豐富，就愛靠自家个煞猛摎堅持去撰寫自家个人生劇本。
係講人生毋煞猛，有較好个人生劇本乜無用，最尾較好个人生劇本乜會漸漸變毋好忒；係講人生當煞猛，一開始个人生劇本毋好乜毋使失志，最尾乜會有堵著對頭風嗄顛倒贏个時節，你兜講係無？
雖然逐個人个人生劇本內容無共樣，長度乜無共樣，毋過逐個人个劇本都有一隻共樣个位所，該就係—都有「最尾一頁」。就像歷代皇帝个人生劇本共樣乜有最尾一頁，該兜皇帝用一生人去求長生不老个仙丹，最尾還係無法度改變自家人生劇本个長度。人生無重來一擺个機會，等到人生个劇本翻到最尾一頁个時節，就表示愛下台一鞠躬咧，離開人生這隻舞台咧。
在人生个舞台頂，歸日在該愁慮麼个時節劇本會翻到最尾一頁，毋當逐日摎自家个角色做好，保持樂觀个態度，帶分身邊个人快樂摎正能量，趕後生个時節煞猛打拚，毋好浪費時間等到滿頭白毛正來後悔，該就昶慢咧，到時噭到嘶胲另命、膝頭出目汁乜無效，斯做得像十二月个大菜共樣，摎傷心留在心肝肚定定。
𫣆俚逐個人來到這隻世界个機會斯有一擺定。人生短短幾下十年，時間過忒咧就毋會倒轉來，時間乜毋會為著麼儕停留，再過一百年，這隻世界上無你乜無𠊎。既然恁樣，在自己个人生劇本裡背，𫣆俚應該愛認真做好自家个角色，把扼現下，勇敢做自家，在有限透个人生中，做有意義个事情，珍惜身邊个人、事、物，毋好分自家个人生留有一息息个遺憾，恁樣正毋會枉費斯有一擺機會个人生，這生人正毋會「石灰掞路—打白行」。
註釋
1. 欽羨：kimˋ sienˇ，羨慕。
2. 愁慮：seu li+，憂慮。
3. 毋當：m dongˇ，不如。
4. 滿頭白毛：manˋ teu pagˋ moˋ，滿頭白髮。
5. 噭：giauˇ，哭、哭泣。
6. 嘶胲另命：seˋ goiˋ nangˇ miang+，聲嘶力竭。
7. 十二月个大菜—上心：shibˋ ngi+ ngiedˋ gaiˇ tai+ coiˇ—shongˋ simˋ。大菜，芥菜。上心，蔬菜成熟長出花梗。這一句是客家諺語，以「上心（shongˋ simˋ）」諧音雙關「傷心（shongˋ simˋ）」。
8. 幾下：gia+，由「幾（giˊ）」和「下（ha+）」連音而成，「好幾…」的意思。
９. 把扼現下：baˊ ag hien+ ha+，把握當下。
10. 石灰掞路—打白行：shagˋ foiˋ rham+ lu+—daˊ pagˋ hang。掞，撒。把石灰撒在路上，跟著白色的石灰走。這一句是客家諺語，比喻白走一趟的意思。
華語
人生就像一齣戲，每個人都有自己的劇本，也都是自己劇本裡面的主角。在自己的人生舞台上，想要怎麼表演就怎麼表演，因爲自己是主角，也是導演。
世上沒有誰的人生劇本是「完美」的。有錢人有有錢人的煩惱，窮人也有窮人的快樂，所以不用羨慕別人的劇本比自己好。每個人的人生劇本不是一出生就寫好的，劇本的內容是會跟著人生努力與堅持的程度不斷在改變。我們不能選擇自己的出生，但是我們可以決定自己的未來，因為自己的人生劇本自己做主，想要未來的人生精彩又豐富，就要靠自己的努力與堅持去撰寫自己的人生劇本。
如果人生不努力，有再好的人生劇本也沒用，最後再好的人生劇本也會漸漸變不好；如果人生很努力，一開始的人生劇本不好也不用喪志，最後也有逆風翻盤的時候，你們說是嗎？
雖然每個人的人生劇本內容不一樣，長度也不一樣，但是每個人的劇本都有一個共通點，那就是—都有「最後一頁」。就像歷代皇帝的人生劇本一樣也有最後一頁，那些皇帝用一生去追求長生不老的仙丹，最後還是沒有辦法改變自己人生劇本的長度。人生沒有重來一次的機會，當人生的劇本翻到最後一頁的時候，就表示要下台一鞠躬，離開人生這個舞台了。
在人生的舞台上，與其整天憂慮什麼時候劇本會翻到最後一頁，不如每天把自己的角色扮演好，保持樂觀的態度，帶給身邊的人快樂與正能量，趁著年輕的時候努力打拚，不要浪費時間等到滿頭白髮才後悔，那就太遲了，到時候哭到聲嘶力竭、膝蓋都流出了眼淚也沒用，只能像十二月的芥菜一樣，把傷心留在心中而已。
我們每個人來到這個世界的機會只有一次。人生短短數十年，時間經過了就不會再倒流，時間也不會為了誰而停留，再過一百年，這個世界上沒有你也沒有我。既然如此，在自己的人生劇本裡面，我們應該要認真扮演好自己的角色，把握當下，勇敢的做自己，在有限的人生中，做有意義的事情，珍惜身邊的人、事、物，不要讓自己的人生留有一點遺憾，這樣才不會枉費只有一次機會的人生，這一生才不會白走一趟。