文／邱鴻春，客語支援教師，桃園楊梅伯公岡客家人（海陸腔）
菜園原野常看著
開花打頭來獻寶
難得發現四皮葉
又再得名幸運草
細人分毋清楚四點根摎鵓鴣酸，有一站仔時間，緊話著四點根就係鵓鴣酸仔，到當大咧正搞清楚。講著這四點根，雖然係一種野草，毋過還係有佢个利用價值，就看你曉得用無？對細人來講，實在就係好東西，佢歸身係寶，頭襬環境毋好，無零嗒好食，細人會自家想辦法尋食，像這四點根就係其中一樣，輒常會去崗頂，無斯菜園摘四點根，先摎葉捏忒，正摎梗洗淨來，拿兜鹽撚撚挲挲仔，鹹酸甜、鹹酸甜盡好食哦。
前兩日仔，去菜園摎阿姆𢯭手改薯仔，無意中改著四點根，居然發現有打頭盡大隻，又再想起細人个時節，除了摘梗食，下把仔乜還會有頭，這頭比梗還較好食，不但毋會酸還盡甜，毋過愛揀時節正有，無特別記哪下會有，就恁樣緊改薯仔，看著就順續拈起來抨脣頭，薯改好就拈拈共下，洗淨拿轉屋下，堵好倈仔、心臼、孫女轉來，就問佢兜知這係麼个無？心臼居然講係菜頭無，實在𠊎會昏忒，菜頭無恁細个啦！
食飽夜做閒咧，做過拿來先洗加一遍，洗較淨俐兜仔，食食看有摎頭擺味道共樣無，好好來回味一下。唉喲！阿姆哀正好，夭壽好食欸，毋會昶甜、毋會酸、毋會澀，堵堵好食，當符合這下人个要求，當湛斗欸。同時想著頭擺做細人仔，逐日無愁無慮，毋係搞就係滿哪仔尋食，雖然無像這下細人仔恁好命、恁豐湧，想愛麼个就有麼个，甚至還有零星錢好分好使，毋過，𠊎感覺這乜係，另外一種難得个幸福，毋使上補習班摎課後安親班，自由自在當爽，還逐日做得上免費又好搞个野外求生課程。
四點根這名仔試著已生趣，自家緊愐，敢會係因為葉四皮抑係花四皮个關係，翻開來詳細看一遍，居然葉正三皮定定，但係花有五皮，該這就奇呀怪呀，仰般會安到四點根呢？分𠊎疑狐當久，問七十零歲阿姆，阿姆講，𠊎乜毋知，傳下來大家就恁樣講。包尾查兜資料正知，原來佢本來就係三皮葉，係有人發現著盡難得个四皮葉，看著儕表示當有福氣當好運，所以正會安名四點根無斯幸運草。
想著頭擺辛苦个耕種人，實在斯盡有智慧、盡有度量也已笑科，摎這恁得人惱，生到滿哪仔密密，隨時在該搶菜个肥料，除就除毋絕个草，安到恁好聽个名仔來自娛娛人，到底這兜係先人抑係仙人，這下个𫣆俚敢做得著？
華語
紫花酢漿草
菜園原野常看到
開花結果來獻寶
難得發現四片葉
又再得名幸運草
小時候分不清楚紫花酢漿草和黃花酢漿草，有一段時間，一直以為紫花酢漿草就是黃花酢漿草，長大了才搞清楚。講到這紫花酢漿草，雖然是一種野草，不過還是有它的利用價值，就看你會用嗎？對小孩來講，實在就是好東西，它全身是寶，以前環境不好，沒有零食好吃，小孩會自己想辦法找東西吃，像這紫花酢漿草就是其中一樣，時常會去荒野，不然就是菜園摘紫花酢漿草，先把葉捏掉，再把梗洗乾淨，拿點鹽來抹一抹，酸甜中帶點鹹味很好吃喔。
前兩天，去菜園幫媽媽翻土採收樹薯，無意中挖到紫花酢漿草，居然發現有地下莖很大，又再想起小的時候，除了摘莖來吃，有時候也還會有地下莖，這地下莖比莖還要好吃，不但不會酸還滿甜的，不過要挑對季節才有，沒特別記下哪時有，就這樣繼續挖樹薯，看到就順便撿起來丟旁邊，挖好樹薯就撿在一起，洗乾淨拿回家，剛好兒子、媳婦、孫女回來，就問他們知道這是什麼嗎？媳婦居然說是蘿蔔嗎，實在我會暈倒，蘿蔔沒有這麼小的啦！
吃完晚飯有空了，再拿來洗一遍，洗乾淨一點，吃吃看和以前味道有一樣嗎，好好來回味一下。唉喲！我的媽啊，夭壽好吃欸，不會太甜、不會酸、不會澀，剛剛好，很符合現代人的要求，很棒欸。同時想到以前小孩子，每天無憂無慮，不是玩就是到處找吃的，雖然不像現在小孩子那麼好命、那麼奢侈，想要什麼就有什麼，甚至有些還有零用錢好花，不過，我感覺這也是另外一種難得的幸福，不用上補習班和課後安親班，自由自在很爽，還每天可以上免費又好玩的野外求生課程。
客語四點根這名字覺得很有趣，自己一直在想，難道會是因為葉四片或者花四片的關係，翻開來詳細看一遍，居然葉子才三片而已，但花卻有五片，那就奇呀怪呀，怎麼會叫做四點根呢？讓我疑惑很久，問七十幾歲媽媽，媽媽說，我也不知道，傳下來大家就這樣說。後來查一些資料才知道，原來它本來就是三片葉子，是有人發現到很難得的四片葉，看到的人表示很有福氣很好運，所以才會取名四點根或是幸運草。
想到以前辛苦的農夫，實在是很有智慧、很有度量也很滑稽，把這討人厭，長的到處都是，隨時都在搶菜的肥料，除都除不盡的野草，取一個那麼好聽的名字來自娛娛人，到底這些是先人還是仙人，現在的我們做得到嗎？