文／李文煥
苗栗縣客家人，國中特教教師，現下戴苗栗（四縣腔）
有一年，南庄這一搭仔鬧天旱。對三灣一路彎斡入南庄，滿山打無獵物，田坵必開，菜園燥忒，連河壩水乜溓淨淨，魚仔蝦公消忒到無半隻。天時熱到雞仔毋啼，鳥仔毋生卵。
這日，阿廖伯走去深山裡背打獵，賭造化仔看會有收穫無，好分屋下人有一餐溫飽。無想著佢在大山裡背，一步無躪好嗄跌落崁，一路輾等下。阿廖伯目珠一眨，歸身骨頭節節痛，心肚想：「阿義哥个赤牛－－壞蹄！這擺死無命了，屋下還有三個妹仔，仰般正好呢？」
這時，有一條大烏蛇對半山排串過來，軟軟又冷冷个蛇身摎阿廖伯擋下來，毋分佢再輪落去，斡頭順勢摎佢盤起來。阿廖伯心肚想：「阿姆哀！無想著無墜死，嗄會分這條大蛇哥咈忒了！」
大烏蛇搖等比西瓜較大个頭那，開嘴講：「老阿伯，毋使驚。𠊎在這深山修行千年，毋會害你。毋過因為修行愛了結世間个緣分，𠊎需要尋一個後生妹仔結親。算著同若屋下有緣，你有三個妹仔，請你轉去問看那，看哪隻妹仔肯嫁分𠊎？」
阿廖伯聽著，心肚當歡喜，因為大烏蛇毋會食佢。佢笑等應講：「多謝蛇王救命恩情，𠊎轉去煞煞問三隻妹仔个想法。」
大烏蛇哈哈笑講：「丈人老，當好！𠊎遽遽轉去準備討親个事，加三日準時去你屋下討親。」
講煞，大烏蛇摎受傷个阿廖伯擎到山頂，對佢噴出帶腥味个白煙包等圓身。一杯茶个工夫過後，阿廖伯全身恢復到好好。佢拜謝大烏蛇，趕天吂斷烏煞煞轉去。
轉到屋下，三隻妹仔看阿爸面色砉青，相賽問發生麼个事情？阿廖伯將事情頭來尾去講分明，乜問三個妹仔：「麼人肯嫁分蛇王，代阿爸報恩？老古人言：『食人一口，還人一斗。』救命个恩情，做毋得無報。」
大妹仔額結結講：「阿爸，你係毋係嚇到戆忒？這世間哪有蛇王？就算有，也係妖怪，𠊎正無愛嫁分妖怪！」
二妹仔接等講：「著啊！阿爸，𠊎無愛嫁分蛇哥！𠊎生到恁靚，將來定著會嫁分有錢人過好日仔！」
阿廖伯聽著，敨一口氣，望向滿妹仔：「三妹，你呢？」
三妹講：「阿爸，𠊎願嫁分蛇王報恩。若毋係蛇王救你，𠊎這下就無阿爸了！佢恁有善心，定著係好人。」
三妹又細聲補一句：「毋過𠊎細時發天花，歸面仔藕藕，蛇王毋知會棄嫌無？」
三日後，庄頭出現一頂討親个花轎，緣投後生人著烏衫騎等白馬行前來，笑等講：「丈人老，𠊎來迎親了，你哪隻妹仔愛嫁分𠊎？」
三妹毋想分蛇王失望，面項蒙等羅帕，驚驚險險頭磬磬行入轎仔。
花轎一路扛到南庄烏蛇嘴，一陣白煙過後，討親个陣頭總下現形：馬仔變膨尾鼠、轎夫變山狗大、樂隊變竹雞仔，新郎乜變轉大烏蛇。三妹驚到激激顫，大烏蛇開口安慰：「三妹，毋使驚，這下你係吾餔娘，𫣆共下來修行，𠊎會好好痛惜你。」
日仔過忒三隻月，三妹同蛇郎感情緊來緊好。大烏蛇輒輒變轉人形，陪三妹遶山看花，兩儕既經係恩愛公婆。蛇王惜三妹，知佢面項有疤，無嫌佢媸，偷偷仔割自家一垤肉做藥引。蛇肉向來治皮膚見效，莫講這還係千年蛇王个肉。
三妹毋知，食下蛇王合个藥仔。正食落肚定定，面項就癢到佇毋著，續等面皮一層一層㪐下，冷冷个風過面，一陣涼涼。
大烏蛇笑等拿鏡仔分三妹看。佢著驚講：「啊哦！鏡仔肚項靚阿妹仔係麼儕？無成正經係𠊎？」
佢這下正發覺蛇王手臂少一垤肉，血漬漬仔還在出血，遽問：「郎君手仰般受傷了？」
大烏蛇笑講：「無事，少一垤肉定定無要緊。這藥引當好，換來一個像仙女共樣个餔娘！」
自從蛇王同三妹結親以後，修行因愛情个幫襯，功力一日千里。三妹心肝善良，知蛇郎修成降雨个法力，䟓䟓做客家米食：紅粄、艾粄、豬籠粄，摎蛇王慶賀。
大烏蛇食著粄仔感動講：「好三妹，這兜粄仔𠊎當中意食，你愛麼个禮物，老公送你。」
三妹忽然跪下講：「郎君，𠊎麼个都無愛，求你施法落雨，分南庄天旱早日過忒，鄉親看等就會無命了。」
大烏蛇大笑：「好、好、好，𠊎个好三妹！」跈等運法力，降下甘霖，解南庄天旱。
對該日起勢，相傳南庄人若係堵著困難，只要準備大烏蛇好食个粄仔來拜，願望就會實現。
華語
有一年，南庄這一帶鬧旱災。從三灣一路蜿蜒進入南庄，滿山打不到獵物，田地乾裂，菜園枯乾了，連河水也快見底了，魚蝦消失得一隻不剩。天氣熱到雞不啼叫，鳥也不下蛋。
這一天，阿廖伯跑去深山裡打獵，碰碰運氣看能不能有些收穫，好讓家裡人有一餐溫飽。沒想到他在大山裡，一步沒踩穩，竟然跌落懸崖，一路滾了下去。阿廖伯眼睛一閉，全身骨頭就快散架一般，心裡想：「壞了！這次恐怕沒命了，家裡還有三個女兒，該怎麼辦才好呢？」
這時，一條大烏蛇從半山腰串過來，柔軟又冰涼的蛇身把阿廖伯擋了下來，不讓他繼續滾落，轉頭順勢把他盤了起來。阿廖伯心裡想：「我的媽呀！沒想到沒摔死，反而會被這條大蛇吞了！」
大烏蛇搖著比西瓜還大的頭，開口說：「老伯，不用害怕。我在這深山修行千年，不會害你。不過因為修行需了結世間的緣分，我需要找一個年輕女子結親。算起來跟你家有緣，你有三個女兒，請你回去問問，看哪個女兒願意嫁給我？」
阿廖伯聽了，心裡很高興，因為大烏蛇不會吃他。他笑著回答：「多謝蛇王救命之恩，我回去趕快問三個女兒的想法。」
大烏蛇哈哈笑著說：「老丈人，太好了！我趕緊回去準備提親的事，三天後準時去你家迎親。」
說完，大烏蛇把受傷的阿廖伯抬到山頂，對他噴出帶著腥味的白煙包圍全身。一杯茶的時間過後，阿廖伯全身恢復得好好的。他拜謝大烏蛇，趁著天還沒黑，趕緊回家。
回到家，三個女兒看父親臉色發青，就急忙問發生了什麼事。阿廖伯將事情的來龍去脈說清楚，也問三個女兒：「誰肯嫁給蛇王，替爸爸報恩？古人說：『吃了人家一口，要還人家一斗。』救命的恩情，不能不報。」
大女兒皺著眉頭說：「爸爸，你是不是嚇傻了？這世間哪有蛇王？就算有，也是妖怪，我才不要嫁給妖怪！」
二女兒接著說：「是啊！爸爸，我不要嫁給蛇！我長得這麼漂亮，將來一定會嫁給有錢人過好日子！」
阿廖伯聽了，嘆了一口氣，望向最小的女兒：「三妹，你呢？」
三妹說：「爸爸，我願意嫁給蛇王報恩。若不是蛇王救你，我現在就沒有爸爸了。牠這麼有善心，一定會是好人。」
三妹又輕聲補了一句：「不過我小時候出過天花，滿臉坑坑疤疤，蛇王不知道會不會嫌棄？」
三天後，村莊裡出現一頂迎親的花轎，英俊年青人穿著黑衫騎著白馬走過來，笑著說：「老丈人，我來迎親了，你哪個女兒要嫁給我？」
三妹不願讓蛇王失望，臉上矇著面紗，戰戰兢兢、低著頭走進轎子。
花轎一路抬到南庄烏蛇嘴，一陣白煙過後，迎親的隊伍全都現出了原形：馬變成了松鼠、抬轎的變成了攀木蜥蜴、樂隊變成了竹雞，新郎也變回了大烏蛇。三妹嚇得全身發抖，大烏蛇開口安慰：「三妹，不用怕，現在你是我的妻子，我們一起修行，我會好好疼愛你。」
日子過了三個月，三妹和蛇郎的感情越來越好。大烏蛇時常變回人形，陪三妹遊山玩水，兩人已經是恩愛的夫妻。蛇王疼惜三妹，知道她臉上有疤痕，不嫌她醜，偷偷割下自己的一塊肉作為藥引。蛇肉一向對治療皮膚有效，更何況這是千年蛇王的肉。
三妹不知情，吃了蛇王調配的藥。剛吃下肚而已，臉上就奇癢難耐，接著臉皮一層一層剝落，冰冷的風吹過臉龐，一陣涼涼的。
大烏蛇笑著拿鏡子給三妹看。她驚訝地說：「哎呀！鏡子裡的漂亮姑娘是誰？這難道真的是我？」
她這時才發覺蛇王手臂少了一塊肉，血淋淋的還在流血，急忙問：「郎君的手怎麼受傷了？」
大烏蛇笑著說：「沒事，少一塊肉而已不打緊。這藥引真好，換來一個像仙女一樣的妻子！」
自從蛇王和三妹成親以後，修行因為愛情的幫助，功力一日千里。三妹心地善良，知道蛇郎已修成降雨的法力，特地做客家米食：紅粄、艾粄、豬籠粄，為蛇王慶賀。
大烏蛇吃著粄感動地說：「好三妹，這些粄我很喜歡吃，你想要什麼禮物，老公送你。」
三妹忽然跪下講：「郎君，我什麼都不要，求你施法降雨，讓南庄的旱災早日過去，鄉親們快要活不下去了。」
大烏蛇大笑：「好、好、好，我的好三妹！」隨即運用法力，降下甘霖，解除南庄的旱災。
從那天起，相傳南庄人如果遇到困難，只要準備大烏蛇喜歡吃的粄來祭拜，願望就會實現。