文／鍾孝昇，國小教師、中壢客家人，這下戴中壢（四縣腔）
講著徐傑添校長，桃園市大部分个校長，毋係佢个學生，就係上過佢个課。1999年，徐校長開始𢯭手教育局辦理校長、主任儲備訓練班个工作，2007年退休後，繼續擔任桃園市校長儲備訓練班个輔導校長，一做就係18期，做得講係「校長个校長」。毋過當毋盼得，舊年4月徐校長不幸過身了。𠊎係佢个學生仔，𠊎整理徐校長个人生故事，同大家紹介這個客家庄出身个校長。
徐校長係桃園新屋人，1947年出世，老屋在社仔溪脣，阿姆四十零歲正降佢，故所從細就得著屋下人个痛惜。國小三年生該下，阿姆百年歸壽，四個阿姊就代阿姆照顧佢。
小學在永安國小讀書，徐校長逐日愛行半點鐘个路，正行得到學校。該央時，姜仁役先生、曾國斌先生輒常鼓勵佢好好讀書，徐校長乜因為恁樣，學業成績越來越好。
徐校長屋下耕田，緊工時節當愛人手，無論讀小學、抑係初中，寒暑假還有放尞日，佢就愛𢯭手做田事。初中三年生个時節，為著愛參加升高中輔導課，借歇大姊徐恩妹屋下，用「早起三朝當一工」个精神，後來就分佢高分考著省立武陵高中。
大學畢業，退伍過後，徐校長轉到母校新屋國中，擔任國文摎公民課先生，月給正1850个銀定定，雖然生活過著異清苦，毋過，這嗄係改變佢一生當重要个選擇。下後，徐校長受著中壢國中教務主任古秀海个邀請，擔任導師。這班學生仔畢業後，堵堵好補校訓導組長有一個缺，佢得著長官个推薦，擔任組長，開始在學校擔任行政工作。
因爭徐校長毋係師範學校畢業个，為著愛同自家个教育專業補轉來，佢到政治大學教育研究所去進修。徐校長平常時就當煞猛做研究，還過輒輒摎教學經驗同大家分享，得著研究所先生个阿腦。有一擺佢帶等餔娘、細人仔去註冊，蔡保田所長就對佢摎一對子女講：「若爸下二擺定著會係一個好校長。」聽著這句話个徐校長，斷真無分蔡所長漏氣，1992年校長甄選及格，1994年派任草漯國中校長，1996年再過調凌雲國中。
該央時，凌雲國中有當多學生仔在隔代教養抑單親个家庭大，有當多學生仔輟學，徐校長當煞猛推動認輔制度，自家也認養兩個學生仔，還過設立當多社團，分學生仔在無共樣个方向，發展自家个能力。徐校長記得教育局王世英局長識分別在朝晨6點40分，當晝11時50分，還過臨暗仔6時40分，連續三擺到學校視察，佢都在學校處理校務。王局長看著徐校長當煞猛來做事，當感心，故所下後當多學校个改革，都得著局長个大力支持。
1999年，徐校長調到有85班个桃園國中做校長。逐日朝晨七點以前，佢帶等兩隻飯篼仔到學校，到暗夜七點正離開。當晝頭，佢還會帶飯篼仔，到無共樣个班項，摎學生仔共下食飯，了解學生仔學習个情形，一日至少會巡學校三擺。
徐校長到桃園國中該下，就請學校先生提供愛仰般進步个建議，佢乜黏時提出解決个方法。徐校長還記得有個先生就對佢講：「𠊎兜就愛恁樣仔个校長。」這句話分佢試著當感心，乜試著自家个打拼，總算有略略仔成績了。
俗話講「人勤地獻寶」，在教育界奉獻恁多年，除忒得著母校永安國小、新屋初中、武陵高中優秀校友獎，也得著師鐸獎、教育部校長行政卓越獎、教學卓越團隊金質獎…這兜。2007年退休後，教育局請佢擔任校長儲備訓練班个輔導校長，繼續為桃園个教育做貢獻。
退休後，除忒含貽弄孫，徐校長開始學畫圖，用粉蠟筆、砂紙創作，這乜係佢生活中最好做个娛樂。佢个作品當有自家个特色，毋單淨得著先生个阿腦，乜分人邀請參加當多擺个畫展。2022年，還摎餔娘—葉紹英先生，共下開了一隻安名做「駐足凝視」个書畫聯展，餳著當多人來參觀。
天有不測風雲，舊年4月，徐校長功德圓滿，轉長山去了。5月14日，教育界人士特別聚集在佢个告別式會場， 感恩徐校長一生對教育工作煞猛打拚。
就像在該領「校長領導卓越獎」該央時，徐校長用「心中有愛、教育無礙，為細人仔耕一坵教育良田。」這句話，表達自家對教育志業个目標。徐校長一生人，就像教育局長張明文頒發「畢業證書」分退休徐校長該下，講个這句話：「徐校長對人誠心，還過對教育熱心，建立了教育界个標竿，佢係教育家个典範。」
華語
說到徐傑添校長，桃園市大部分的校長，不是他的學生，就是上過他的課。1999年，徐校長開始協助教育局辦理校長、主任儲訓班的工作，2007年退休後，繼續擔任桃園市校長儲訓班的輔導校長，一做就是18期，可說是「校長的校長」。不過，令人不捨的是，去年4月徐校長不幸往生了。作為他的學生，我整理徐校長的生平，向大家介紹這位客家庄出身的校長。
徐校長是桃園新屋人，1947年出生，老家在社子溪畔，母親四十多歲才生下他，所以從小就得到家人的疼愛。國小三年級，母親百年歸壽，四位姊姊就姊代母職照顧他。
小學在永安國小求學，徐校長每天要走半個鐘頭的路，才能到學校。當時，姜仁役老師、曾國斌老師常鼓勵他好好讀書，徐校長也因為這樣，學業成績愈來愈好。
徐校長家裡務農維生，農忙時非常需要人手，不論讀小學、或是初中，寒暑假還是放假日，他就要幫忙做田事。初中三年級，為了要參加升高中輔導課，借住大姊徐恩妹家，用「早起三朝當一工」的精神，後來就讓他高分考到省立武陵高中。
大學畢業，退伍後，徐校長回到母校新屋國中，擔任國文與公民課老師，月薪只有1850元而已，雖然生活過得很清苦，不過，這卻是改變他一生很重要的選擇。後來，徐校長受到中壢國中教務主任古秀海的邀請，擔任導師。這班畢業後，剛好補校訓導組長出缺，得到長官的推薦，擔任組長，打開在學校擔任行政工作的開端。
因為徐校長不是師範學校畢業的，為了要補足自己的教育專業，他到政治大學教育研究所進修。徐校長平常就很努力做研究，還常常將教學經驗與大家分享，得到研究所老師的稱讚。有一次他帶等太太、小孩去註冊，蔡保田所長就對他和一對子女說：「你爸爸日後一定會是個好校長。」聽到這句話的徐校長，果真沒讓蔡所長漏氣，民國81年校長甄選及格，1994年派任草漯國中校長，1996年再調任凌雲國中。
當時，凌雲國中有許多學生是隔代教養及單親家庭出身的，有很多學生輟學，徐校長很努力推動認輔制度，自己也認養兩位學生，並設立很多社團，讓學生在不同的面向，發展自己的能力。徐校長記得教育局王世英局長曾分別在早上6點40分，中午11時50分，還有傍晚6時40分，連續三次到校視察，他都在學校處理校務。王局長看到徐校長努力做事，非常感動，因此徐校長後來許多學校的改革，都得到局長的大力支持。
1999年，徐校長調派到有85班的桃園國中當校長。每天早晨7點以前，他帶著兩個便當到學校，到晚上7點才離開。中午，他還會帶著飯盒，到不同的班級，和學生一起吃飯，了解學生學習的情形，一天至少會巡學校三次。
徐校長到桃園國中時，就請學校老師提供要如何進步的建議，他也馬上提出解決的方法。徐校長還記得有老師就對他說：「我們就要這樣的校長。」這句話讓他相當感動，也覺得自已的努力，總算有一些成績了。
人勤地獻寶，在教育界奉獻這麼多年，除了得到母校永安國小、新屋初中、武陵高中優秀校友獎，也得到了師鐸獎、教育部校長行政卓越獎、教學卓越團隊金質獎…等。2007年退休後，教育局請他擔任校長儲訓班的輔導校長，繼續為桃園的教育做貢獻。
退休後，除了含飴弄孫，徐校長開始學繪畫，用粉蠟筆、砂紙創作，這也是他生活中最喜歡的娛樂。充滿自己特色的作品，不但得到老師的稱讚，也受邀參加許多次的畫展。2022年，還與太太葉紹英老師，一起開了一個名為「駐足凝視」的書畫聯展，吸引許多人來參觀。
天有不測風雲，去年4月，徐校長功德圓滿，往生西方。5月14日，教育界人士特別聚集在他的告別會場， 感恩徐校長一生對教育工作的努力。
就像在領校長領導卓越獎時，徐校長用「心中有愛、教育無礙，為孩子耕一畝教育良田。」這句話，表達自己對教育志業的目標。徐校長的一生，就像教育局長張明文頒發「畢業證書」給退休的徐校長，講的這句話：「徐校長對人的誠心，以及對教育的熱心，建立了教育界的標竿，他是教育家的典範。」