文／劉菊英，桃園龍潭客家人（四縣腔）
泉水空啊泉水空，屋脣田肚泉水湧，挖井淨愛兩三尺，杓嫲舀水盡省工；
泉水甜來泉水好，百甲良田有水蔭，種个禾筍甜又嫩，年年豐收好年冬。
𠊎个故鄉在龍潭淮仔埔，又安到「泉水空」，這位會安到「泉水空」，係因為屋脣、田肚，滿哪都有清甜个泉水瀑（bau）出來，挖井淨愛兩三尺，杓嫲舀水盡省工，無論洗菜抑洗衫，全當方便，熱天凉沁沁、寒天燒暖暖。
頭擺𠊎耕个田有四股一係濫田，大人行落去，濫膏糜就會漯到大腳髀頂來，因爭蒔禾仔，盡毋好勢，就拿來種禾筍。泉水个水質盡湛斗，種个禾筍莢莢白皙皙、泡馞馞甜又嫩，食過个人全都盡阿腦。禾筍大出收成个時節，台北个菜販仔就會來割轉去賣，價錢異好毋會㜮，除了禾筍生著靚，其他田个禾仔收成乜盡好。
「泉水空」所在盡闊，毋過𠊎歇在偎山排个細莊頭，歸隻莊頭淨有五家人，五家感情像一家，人講一家打粄家家有好食，一家無閒大家來𢯭手，有閒時節大家就來食茶打嘴鼓，無斯共下唱山歌。
若講著愛去街項買東西，路頭異遠，來去就愛歸晝邊，故所，大部分都在細店仔買較多，細店仔細罔細，南北燥貨、豬肉、鹹魚項項齊，若係堵著屋下無錢，乜做得去買，只愛帶數簿仔，記數就做得，頭家人盡好，長透講：錢有三不便，先賒轉去無要緊，有錢正來拆數就好了。
人無千日好，花無百日紅，若毋堵好頭燒額痛，愛去分先生看盡無方便，好得有賣藥先生，來放藥包仔，一個月會來巡一擺，檢查換藥仔，用忒幾多算幾多，實用又利便。
若聽著遠遠傳來，嗶嗶仔个聲，就知閹豬師傅來了，屋下个雞鵠仔，抑係細豬仔愛閹，就喊師傅來，看師傅閹豬仔，就像食粥共樣，無一下功夫，十條細豬仔就閹好了，豬仔閹好，毋使膏藥仔，只愛用火燂煤攪正茶油，膏在空口就做得，豬嫲若係走醒，就愛去喊牽豬哥个來。
時代在進步，社會改變，早期耕田用犁耙、碌碡，不管蒔田、挲草、割禾項項靠人工，包尾全部分機器包揫揫，後生人各各出去食頭路、買屋仔，鄰舍一家一家搬搬走去，最包尾𠊎兜乜徙出來，上擺轉去行尞，滿哪嗄變到恬肅肅，田園乜全部荒忒，屋仔乜分草包塞塞！
唉！哪久還做得看得著，頭擺鬧熱煎煎个泉水空，留下來就伸瀑出來个泉水，摎分人懷念个甜甜人情味。
華語
泉水空啊泉水空，屋旁田裡泉水湧，挖井只要兩三尺，勺子舀水很方便；
泉水甘甜泉水好，百甲良田有水灌，種的筊筍甜又嫩，年年豐收好年冬。
我的故鄉在龍潭區淮子埔，又叫做「泉水空」，這裡之所以會叫「泉水空」，是因為房屋旁、稻田裡，到處都有清甜的泉水湧出，挖井只要兩三尺，用杓子就可以舀到水，省時又省力，不管是洗菜或洗衣服，都很方便，夏天清凉、冬天暖呼呼的。
從前我耕的田有四分之一是爛泥巴田，大人踩下去，爛泥巴就會陷到大腿，因此插秧非常的不方便，後來就改種筊白筍。泉水的水質非常棒，種的筊白筍又白又嫩，凡是吃過的人都讚不絕口。筊白筍大量出產時，台北的大盤商，就會主動來批發回去賣，價錢很好，除了筊白筍漂亮，其他田裡的稻穀收成也很好。
「淮子埔」範圍很廣，不過，我住在靠山腳下的小村莊，整個村莊只有五戶人家，五家人的感情就像一家，一家做粄家家有得吃，一家忙大家來幫忙，有空的時候，一起來喝茶聊天，不然就是一起唱山歌。
若要上街去買東西，有一段路程蠻遠的，往返就要大半天，所以，大部分都在小雜貨店買比較多，麻雀雖小五臟俱全，南北貨、豬肉、鹹魚樣樣都不缺，若家裡不方便沒有現金，還可以帶著記帳簿，記帳就可以，老闆人非常好，最常說的就是：錢有不方便，先賒帳回去沒關係，等有錢再來還就好了。
人無千日好，花無百日紅，不小心感冒頭痛發燒，要去看醫生不方便，還好有賣藥的先生，來放藥包，一個月會來巡一次，檢查換新藥，用多少算多少，實用又方便。
如果聽到遠遠傳來，嗶嗶的聲音，就知道閹豬的師傅來了，家裡年輕的小公豬，或是小公雞要結紮，就去喊師傅來，看師傅幫小公豬結紮，就像喝稀飯一樣的簡單，轉眼功夫，十隻小公豬就結紮好了，小公豬不用擦藥，只要用大鍋背面燒焦的煤灰，刮下來攪茶油，塗在傷口就可以了，母豬若發情，就要找種豬來配種。
時代進步、社會改變，早期耕田用犁耙和打碎泥塊整田的農具，不管插秧、除草、割稻都需要靠人工，現在全被機器所取代了。年輕人都到外地工作、買房子，鄰居一家一家的搬走了，最後我也搬走了，上次回去走走，所到之處都安靜無聲，田園也全部荒廢了，房子也雜草叢生！
唉！再也看不到，之前熱鬧非凡的泉水空，留下來就只有湧出來的泉水，和讓人懷念的甜甜人情味。
看更多《客新聞》https://hakkanews.tw/