文／李秀鳳，新竹客家人，國中小學客語先生，這下戴中壢（腔頭：海陸腔）
還細時節，堵著落水天个放尞日，𠊎兜幾下個叔伯姊妹最好在𠊎爺哀睡个八架床頂高，披等被單，比手畫腳，咿咿啊啊…，學伯公下戲棚頂个阿旦唱曲，做新娘儕還𠖄等一條大紅手帕。阿婆看著，就會緊笑緊罵：「你這兜細妹𧊅仔恁刺額，日後會嫁毋出去。」
頭襬戴在莊下，細妹人若係較多話、較活跳，輒常會分屋下个世大人罵「刺額」，所以𠊎知「刺額」係刻人个話，盡毋好聽。九年前，開始準備考客語中高級認證，認識了當多客家字，正知「刺額」本旦个意思毋係罵人三八，係講老古時代，有兜民族个人會在面項、額頭頂刺花紋，係當有文化个語詞啊！毋知仰般會變做罵人个話？
這下想起，其實阿婆係一個當好「刺額」个老人家。戴在對門山頂，有一個分𠊎兜細孲仔喊做番婆个老阿婆，三頭兩日斯會來尋阿婆譫哆。這個毋知係哪族个原住民阿婆，講客講到當滑溜，佢毋單淨刺額，還刺面頰卵，歸面一大搭烏疏疏。𠊎試著阿婆摎佢恁有話講，可能係因為兩儕个面貌當相像。因為長年透天著等深藍色大衿衫个阿婆，後生時節識遰過天花，所以滿面滿手全係烏跡个燥瘌。兩個老人家背痀痀坐在屋簷下个矮凳頂，有講有笑，遠遠看過去，當像兩隻阿啾箭在該打嘴鼓。
包尾正知，原住民个「刺額」，就係華語講个「刺青」。「刺青」，客語安到「刺龍刺鳳」抑係「刺龍刺虎」。相信在盡多人个傳統觀念裡肚，對膴身項有刺龍刺鳳个人，大體都無好印象，試著佢兜毋係積惡个鱸鰻頭就係無正經个細妹人。𠊎个想法乜差毋多係恁樣。毋過，幾下年前，聽了一個退休个高中先生分享佢个攝影作品，改變𠊎對刺龍刺鳳个看法。
這個生到細細隻个細妹先生，最好揹等大翕相機滿哪仔去翕相。有一日，戴在同社區个倈仔心臼屋下重新裝潢，倈仔請佢有閒來監工。佢行入倈仔个屋肚，看到便所裡肚有一個無著衫个工人，跍等在該舖「泰魯taiˋ luˇ」，背囊頂一條牙狌狌个青龍，目䁯䁯看等一條惡豺豺个猛虎，這幅畫像係當強个電流，掣著佢心肝頭緊顫。佢煞煞問該個工人：「𠊎做得轉去拿翕相機翕你背囊頂个刺龍刺虎無？」這個工人斡頭看著佢崇拜个眼神，就應講：「做得啊！」
佢半行半走轉去屋下拿翕相機，厥老公看佢緊拚拚走轉來，問佢做麼个？知了因由，斯開聲罵：「祭衰人正得！恁無正經个餔娘人，麼个毋好翕，翕打赤膊个男仔人。」佢無插厥老公个誚㸐，拿著翕相機就舂等出。
記得該日係冬下頭个下晝，𠊎兜十幾個婦人家尖在社區狹擳擳个會議室裡肚，欣賞該一張又一張無共樣角度个龍虎鬥相片，該條青龍目瞋瞋看等猛虎，猛虎也牙豺豺像愛咬龍頭个樣仔，實在刺到當好，正經係一幅「生龍活虎」个藝術作品，分人試著當感心又燒暖。
因為這份感動一直囥在心頭，所以，兩年前，在加拿大溫哥華讀大學个妹仔，透過視訊摎𠊎講佢想愛去刺龍刺鳳，該量時个𠊎無著驚，也無嘶胲另命喊佢毋好去，斯平靜問佢仰會想恁樣做？
華語
還小的時候，遇到下雨天的假日，我們幾個堂姊妹們最喜歡在我父母睡的紅眠床上，肩背上披著被單，比手畫腳，咿咿啊啊…，學土地公廟野台戲的小旦唱戲，扮演新娘的頭上還會蓋著一條大手帕。阿婆看到，就會一邊笑一邊罵：「你們這群小女生這麼三八，以後會嫁不出去喔！」
從前住在鄉下，女孩子如果比較多話、比較活潑，經常會被家裡的長輩罵「刺額」（喻指女子行為調皮、不莊重，好賣弄），所以我知道「刺額」是罵人的話，很不好聽。九年前，開始準備考客語中高級認證，認識了很多客家字，才知「刺額」原本的意思不是罵人三八，是說在古老時代，有些民族的人會在臉上、額頭上刺花紋，是很有文化的語詞呀！不知怎樣會變成罵人的話？
現在想起，其實阿婆是一個很喜歡「刺額」的老人家。住在對門山上，有一個被我們小孩叫做番婆的老阿婆，三天兩頭就會來找阿婆聊天。這位不知是哪一族的原住民阿婆，講客語講得很流利，她不只刺額，還刺臉頰，整臉一大片黑漆漆。我覺得阿婆跟她這麼有話聊，可能是因為兩人的面貌很像。因為一整年穿著深藍色長衫的阿婆，年輕時曾感染過天花，所以滿臉滿手全是黑色的疤痕。兩個老人家彎腰駝背坐在屋簷下的矮凳上，有說有笑，遠遠看過去，很像兩隻大捲尾鳥（俗稱烏秋）在那裡閒聊。
後來才知，原住民的「刺額」，就是華語講的「刺青」。「刺青」，客語叫做「刺龍刺鳳」或是「刺龍刺虎」。相信在很多人的傳統觀念裡，對身上有刺青的人，大致上都沒有好印象，覺得他們不是作惡多端的流氓就是不正經的女人。我的想法也差毋多是這樣。不過，很多年前，聽了一位退休的高中老師分享她的攝影作品，改變我對刺青的看法。
這位長得嬌小的女老師，最喜歡背著大相機到處去攝影。有一天，住在同社區的兒子媳婦屋內重新裝潢，兒子請她有空時來監工。她走進兒子的屋裡，看到廁所裡有個沒穿衣服的工人，蹲著正在鋪地磚，背上一條齜牙咧嘴的青龍，怒視看著一條兇惡的猛虎，這幅畫像是很強的電流，電到她心裡一直顫抖。她趕快問那個工人：「我可以回去拿照相機拍你背上的刺青嗎？」這個工人轉頭看到她崇拜的眼神，就回說：「可以啊！」
她半走半跑回家拿照相機，她老公看她匆匆忙忙跑回來，問她做什麼？知道原因，就開口罵：「真是很丟臉！這麼不正經的婦人，什麼不好拍，拍打赤膊的男人。」她不理會老公的嘲諷，拿著相機就衝出去。
記得該日是冬天午後，我們十幾個婦人家擠在社區狹窄的會議室裡，欣賞那一張又一張不同角度的龍虎鬥照片，那條青龍瞪大雙眼怒視著猛虎，猛虎也露出尖牙像要咬龍頭的樣子，實在刺得很好，真的是一幅「生龍活虎」的藝術作品，讓人覺得很感動又溫暖。
因為這份感動一直藏在心頭，所以，兩年前，在加拿大溫哥華讀大學的女兒，透過視訊跟我講她想要去刺青，那時的我沒有驚嚇，也沒有聲嘶力竭叫她不要去，只是平靜問她為什麼想這樣做？
看更多《客新聞》https://hakkanews.tw/