文／邱鴻春，客語支援教師，桃園楊梅客家人（海陸腔）
〈阿丑琢蟬〉／邱鴻春（海陸腔）
頭擺人有慶
看蟬徙步扭屎胐
安名生趣又好聽
上回有摎大家分享在楊梅發現个白蠟蟬，有一位羅先生盡支持𠊎寫个拙作，盡煞猛𢯭手分享在盡多个Line群組社團頂高，感謝有盡多先生个阿腦鼓勵，堵好有一隻群組，𠊎無在該裡背，羅先生也盡煞手摎𠊎講，有前輩講，這安到阿丑琢蟬。
聽著這名仔感覺異生趣，害𠊎愐欸好多日，仰般想就想毋解，明明著等恁靚个新娘大禮服衫，仰會係阿丑呢！乜問了好多位較年長个客家先生，還過九十歲个阿爸，摎還吂八十歲个阿姆，全講無聽過乜無看過，該斯奇啊怪啊！
照等頭擺讀書做研究个精神，無舞清楚來，實在毋甘願，在無計个情況之下，唯一想著个，就係做過去該樹仔看，看這蟬仔，到底哪位有像阿丑無？吂行到，在好遠就看著佢兜个靚身胚，實在斯無像阿丑。這擺盡量行較兼兜仔來看，阿姆哀正好！原來佢徙步，摎𠊎進前看著該一擺，有盡大个不同，居然還會扭屎胐花，正經有像外背表演个阿丑，總算有了解咧。盡佩服頭擺个人有慶，安名安到恁貼心，生趣好記又得人惜，𠊎完全相信佢个客家名仔，就安到阿丑琢蟬咧。
想想𠊎等頭擺客家人，勤儉做家，天矇光就出門，斷烏正轉屋，做到兩頭烏，係當正常个，假使放工食晝歇睏一下，看著這生趣得人惜个阿丑琢蟬，馬上做得放輕鬆下來，乜係一種湛斗个享受，落一句這下个華語詞「很療癒」。
這下人生活步調較遽，逐條神經全弓到緪緪，係毋係下把仔，做得做一下阿丑，分自家抑係身邊个人，帶來輕鬆个氣氛，多一息仔笑容，係毋係家庭會較和挼，感情自然會較好，就像老萊子共樣，阿姆歡喜自家乜快樂。
在事場下摎同事之間，不管係長官抑承勞，係毋係會有較好个人際關係，大家个工作效率提高，尤其係對逐日用腦，在開發部門个好朋友，係毋係頭腦會較清楚兜仔，做得刺激出來還較多个好想法，創造出還較多个好產品，分世界人還較方便來使用，正係大家个福氣。
華語
〈小丑蟬〉／邱鴻春
以前人好棒
看蟬移步扭屁股
取名有趣又好聽
上回有和大家分享在楊梅發現的白蠟蟬，有一位羅老師很支持我寫的拙作，很勤奮幫忙分享在很多的Line群組社團上面，感謝有很多老師的讚美鼓勵，剛好有一個群組，我沒在那裡面，羅老師也很快的通知我說，有前輩說，這叫做小丑蟬。
聽到這名字感覺很有趣，害我想了好多天，怎麼想就想不解，明明穿著這麼漂亮的新娘大禮服，怎麼會是小丑呢！也問了好多位比較年長的客家老師，還有九十歲的爸爸，和還沒八十歲的媽媽，都說沒聽過也沒看過，那可就奇啊怪啊！
本著以前念書做研究的精神，沒搞清楚來，實在不甘願，在絞盡腦汁的情況之下，唯一想到是，就是再過去樹那邊看看，看這蟬到底哪裡有像小丑？還沒走到時，在不遠處就看到他們的漂亮身影，實在一點都不像小丑。這次盡量走的比較靠近一點來看，我的媽呀！原來他移動的方式，和我之前看到的那次，有很大的不同，居然還會扭屁股！真的有像在外面表演的小丑，總算有了解了。很佩服以前的人好厲害，取的名字這麼貼切，有趣好記又可愛，我完全相信他的客家名字，就叫做小丑蟬了 。
想想我們以前的客家人，勤儉持家，天沒亮就出門，天黑了才回家，從早忙到晚，是很正常的，假使放下工作吃午餐休息一下，看到這有趣可愛的小丑蟬，馬上可以放鬆下來，也是一種很棒的享受，套一句現在的華語詞「很療癒」。
現在的人生活步調比較快，每條神經都繃得緊緊的，是不是有時候，可以做一下小丑，給自己或是身邊的人，帶來輕鬆的氣氛，多一點點笑容，是不是家庭會比較和樂，感情自然會比較好，就像老萊子一樣，媽媽高興自己也快樂。
在職場上跟同事之間，不管是長官還是夥計，是不是會有比較好的人際關係，大家的工作效率提高，尤其是對每天用腦，在開發部門的好朋友，是不是頭腦會比較清楚一點，能刺激出更多的好想法，創造出更多的好產品，方便全世界人來使用，才是大家的福祉。
延伸閱讀：
這篇文章 【寫客文】楊梅蠟蟬 阿丑琢蟬 最早出現於 客新聞 HakkaNews。