文／李秀琴，苗栗客家人，中小學客語先生，這下戴台南市（腔頭：四縣腔）
二十四節氣个驚蟄過後，春天該成時燒暖、成時清冷个感覺越來越醹，百花盛開，各有風情，其中盡餳𠊎个係苦楝花。
苦楝花細細蕊仔，大概1公分恁大仔定定，佢有粉色个花皮，茄色个花心。粉茄色个花叢間等嫩青个葉仔，分人感覺著像係在雲霧裡肚个浪漫情懷。莫看苦楝花細罔細毋打眼，行在樹下乜做得鼻著陣陣花香！粉茄色个浪漫加上花香，緊來緊多个愛花人士畀餳來，同佢个靚翕下來，打卡、上傳到網路社群平台項。像這幾日仔在Youtube項名聲盡大个，就係嘉義縣六腳鄉个朴子溪苦楝花道，苦楝花道有2.5公里恁長，在花樹下定定仔行尞，就像行在圖畫裡肚，看等幼秀个苦楝花，鼻等清雅个花香，歸個人身心都鬆爽，麼个懊躁都無了。
苦楝別名苦苓、楝樹、楝子、森樹、翠樹、楝棗樹、紫花樹、紫花木、花心樹、雙白皮、金鈴子摎洋花森等等。苦楝个樹皮、樵頭、樹葉摎果子味道全全苦，故所分人喊做苦楝。學老話个苦楝發音像「可憐仔」，故所早期个學老人毋好在屋脣種苦楝。客家人个苦楝發音係fuˋlien，發音多少有像「福連」，希望福氣連連續續到來个意思，故所客家人較好在屋脣種苦楝。苦楝生長速度遽，毋驚蟲蛀，聽講若係屋下降妹仔，客家人會在屋脣種頭苦楝，等到妹仔大了愛行嫁進前，就會同苦楝倒下來做櫥箱仔分妹仔做嫁妝，結果用了兩三代還本本好好。
苦楝係台灣原生種，屬落葉喬木，樹形像遮仔，做得生到15－20公尺恁高。佢好日晒，耐熱、耐旱、耐風、耐鹽又耐污染，毋管在山排、平洋、草埔抑係河壩脣，都看得著佢姿態柔美又堅毅个身影。苦楝四季各有風情，都適合觀賞。春天新芽一出，花乜跈等綻放，粉紫色配青葉仔，淡雅清秀；熱天葉仔生到榮榮，盡有遮陰个效果；秋天葉仔一皮一皮定定仔跌落，果子慢慢仔轉金黃，樹尾吊等拶拶个金黃玲琅仔，風一吹親像聽得著叮叮叮个聲呢！寒天黃葉落盡，又做得將日照還分大地哩！
越來越多人體會著應該多種在地原生種，減少外來種个樹仔。好得現下个人無管苦楝个學老話係毋係「可憐」，「越在地，越國際。」好賞花个人重視花本身帶分人个感動，摎感動翕下來放在網路項同大家分享，全世界个人都會看得著臺灣。故所在人行道、中央分隔島、河壩脣、公園、學校既經輒常看著苦楝，分大家都看得著苦楝个身影，欣賞得著苦楝花粉茄色个花雨了。下擺行過河壩脣、公園、學校，或者係駛車仔塞在車陣中个時節，請頓腳下來探頭看啊苦楝花，抑係像玲琅仔个金鈴子哦。
華語
二十四節氣的驚蟄過後，春天那時而溫暖、時而料峭的感覺越來越濃，百花齊放，各有風情，其中最吸引我的是苦楝花。
苦楝花花朵小，大概1公分那麼大，有著粉色的花瓣，紫色的花心，而粉紫的花叢夾雜著嫩綠的葉子，讓人感覺像是在雲裡霧裡的浪漫情懷。可別看苦楝花小歸小不顯眼，走在樹下可是能聞到陣陣花香！粉紫的浪漫加上花香，吸引越來越多的愛花人士，將她的美拍下來，打卡、上傳到網路社群平台上。近日在Youtube上名聲大噪的，就是嘉義縣六腳鄉的朴子溪苦楝花道，這條苦楝花道有2.5公里長，漫步在花樹下，猶如置身在圖畫裡，看著秀麗的苦楝花，聞著清雅的花香，讓人身心都感到舒爽，什麼煩惱都沒有了。
苦楝別稱苦苓、楝樹、楝子、森樹、翠樹、楝棗樹、紫花樹、紫花木、花心樹、雙白皮、金鈴子及洋花森等等。苦楝的樹皮、枝幹、樹葉和果實味道都是苦的，所以被叫做苦楝。閩南話的苦楝發音像「可憐仔」，以致早期閩南人不喜歡在住家旁種苦楝。客家話的苦楝發音是fuˋlien，發音多少有像「福連」，有福氣接二連三到來之意，所以客家人比較喜好在住家旁種苦楝。苦楝生長速度快，不怕蟲蛀，聽說如果家裡生女兒，客家人會在住家旁種棵苦楝，等到女兒長大要出嫁之前，就會將苦楝樹鋸下來做成櫥櫃當嫁妝，結果用了兩三代依舊完好。
苦楝是台灣原生種，屬落葉喬木，樹形像雨傘，高有15－20公尺。她喜好日曬，耐熱、耐旱、耐風、耐鹽又耐污染，不管在山坡、平原、草地或是河岸邊，都看得到她曼妙卻堅毅的身影。苦楝四季各有風情，都適合觀賞。春天新葉長出後，花也隨之而開，粉紫配綠葉，淡雅清新；夏天枝葉茂盛，極具遮陰效果；秋天落葉一片一片慢慢的掉落，果實慢慢轉為金黃，只見枝頭上吊著滿滿的金黃小鈴鐺，風一吹似乎就能聽到叮叮叮的鈴聲呢！冬天枝葉落盡，又能將陽光還給大地啦！
越來越多人體會到應該多種在地原生種，減少外來種的樹。幸好現在的人已不在乎苦楝的閩南話是不是「可憐」，「越在地，越國際。」愛賞花的人重視花本身帶給人的感動，把感動拍下來放在網路上與大家分享，全世界的人都將看得到臺灣。因此在人行道、中央分隔島、河堤邊、公園、學校已常見苦楝，讓大家都看得到苦楝的身影，欣賞得到苦楝花的粉紫花雨囉！下次走過河邊、公園、學校，或是開車塞在車陣中，請停下腳步抬頭看看苦楝花，或是像鈴鐺的金鈴子哦。