文／李秀鳳，新竹客家人，國中小學客語先生，這下戴中壢（腔頭：海陸腔）
妹仔拿出一隻金禁指講：「這係姐婆送分你个，出國前你又送分𠊎，禁指頂背有一條龍摎一隻鳳凰，𠊎想愛摎龍鳳刺在𠊎背囊頂，除忒愛傳承亻恩俚三代人醹醹个親情以外，也希望你摎姐婆做得在𠊎後背掌等，毋好分小人偎兼𠊎。」
毋知仰般，聽妹仔恁樣講，𠊎黏時目汁雙流。妹仔單人獨馬去到天遠地遠个國家讀書，確實需要有人在佢後背守顧等。
看𠊎目汁濫泔，妹仔个目珠也紅紅講：「刺龍刺鳳正經會分人當感動嗬！」續等傳兩張相片分𠊎看，原來佢恁煞手，既經做好功課咧！
第一張相片，係佢摎圓形个金禁指兩頭拉平來翕相，鳳凰嘴擘擘想愛搶龍嘴肚个龍珠，無想著這隻細禁指做工恁幼，阿姆送分𠊎幾下十年，從來毋識詳細看過。
第二張相片，係妹仔在網路頂尋著一個韓國籍个細妹刺龍刺鳳師，摎這張禁指相片傳分佢看，請佢先設計出愛刺到背囊頂个設計圖。𠊎看了設計師畫該條形投當生趣个龍，忍毋核笑出來：「這哪有像龍？龍尾哪有恁長？長尾頂項還間等一節一節烏色个花紋，顛倒像一條瘦夾夾个老虎，龍毋成龍，虎毋成虎，敢看得？」
妹仔應講：「無人看過龍到底生到仰般形啊？無定著佢原旦就係龍身老虎尾个樣仔。過講，阿爸肖虎，生到恁高大，在𠊎背後𢯭掌等，𠊎還較安全。」聽妹仔講煞，試著佢个話係春天个花園—有桃李（有道理）（註1）。
𠊎嘴項雖然無非議妹仔个決定，毋過心肝肚還係希望佢莫去背囊頂刺龍刺鳳較好，賺痛斯有，何麼个死苦？降子身無降子心（註2），𠊎了解妹仔个性體，喊佢毋好去做个事情，佢越會挑挑去做，還毋分𠊎知，所以由在佢去，𠊎在旁脣恬恬關心較贏。
毋過，講去講轉，做阿姆儕總係毋盼得，希望妹仔知難曉得打卵退，毋好恁硬殼。所以勸話佢：「妹仔，𠊎無閒錢來支持你个勇敢唷！你愛等加兩年畢業了後尋著頭路正去刺龍刺鳳，好無？」
「錢个問題，你毋使愁，𠊎應好一間有名个大餐廳做服務生，避暑个時節就愛去打零工賺錢。」到這下，正經係「禾黃水落，飯熟火著」（註3），講麼个都昶慢了。
就恁樣照等計劃一步一步來，有一日，好膽个妹仔正經走去刺龍刺鳳。該暗晡，兩子哀視訊，問佢「苦毒」自家个背囊會艱苦無？佢先傳一張背囊正刺好勢个龍鳳相片分𠊎看，還蒙等一層「保鮮膜」，該隻鳳凰个肉底一大片紅漬漬，妹仔講：「𠊎个背囊項無麼个肉，所以會比該兜刺到大腳髀項抑係屎胐項个人痛加當多。刺該條長尾龍个時節，還忍得核，等著刺鳳凰个膴身摎翼胛該時，因為當幼工，痛到耐毋得，斯開聲大噭哩喲！至少三日做毋得洗身，暗夜愛伏等睡，定著還會痛到爬床扡蓆。」（註4）
妹仔從細就當癢唩，毋堵好跢倒，斯膝頭小可溜皮定定，就會噭到噦噦滾，實在愐毋解恁驚痛个細阿妹仔，仰堅持定著愛去刺龍刺鳳？
𠊎想，忍痛在膴身項刺龍刺鳳，算係現代後生人个一種時行。對待長大成人个子女，佢兜个想法、做法，亻恩俚做爺哀儕，若係做得多去了解、體會、溝通，應該會比責罵、刨合削還較贏。
註1：客語的「桃李」跟「道理」諧音。
註2：降子身無降子心，生下小孩的身體，卻無法生育小孩的心理，意喻子女的想法不是父母能決定。
註3：稻子都成熟轉黃了才下雨，飯都熟了火才點著，意謂太慢了。
註4：爬床扡蓆，以手抓床拉蓆，形容人極端痛苦的情狀。
華語
女兒拿出一個金戒指說：「這是外婆送給你，出國前你又送給我，戒指上有一條龍和一隻鳳凰，我想把龍鳳刺在我背上，除了要傳承我們三代人濃濃的親情以外，也希望你跟外婆可以在我背後看顧，不要讓小人靠近我。」
不知怎地，聽女兒這樣說，我立刻眼淚雙流。女兒單槍匹馬去到非常遙遠的國家讀書，確實需要有人在她後面守顧著。
看我淚流滿面，女兒眼睛也紅紅的說：「刺青真的會讓人很感動嗬！」接著傳兩張照片給我看，原來她這麼快手快腳，已經做好功課了！
第一張照片，是她把圓形的金戒指兩頭拉平來拍照，鳳凰張口想要搶龍嘴裡的龍珠，沒想到這個戒指做工這麼細，老媽送給我幾十年，從來不曾詳細看過。
第二張照片，是女兒在網路上找到一位韓國籍的女刺青師，把這張戒指照片傳給她看，請她先設計出要刺到背上的設計圖。我看了設計師畫那條模樣很有趣的龍，忍不住笑出來：「這哪有像龍？龍尾哪有這麼長？長尾上還間隔一節一節黑色的花紋，反而像一條瘦巴巴的老虎，龍不像龍，虎不像虎，能看嗎？」
女兒回應：「沒人看過龍到底長得怎樣啊？說不定牠原本就是龍身虎尾的樣子。再說，老爸屬虎，長得很高大，在我背後幫忙守顧，我更安全。」聽女兒講完，覺得她的話是春天的花園—有桃李（有道理）。
我嘴上雖然沒反對女兒的決定，不過心裡還是希望她不要去背上刺青較好，自討苦吃，何苦來哉？生子身沒生子心，我了解女兒的脾氣，叫她不要去做的事，佢越會故意去做，還不讓我知道，所以隨她去，我在旁默默關心比較好。
不過，講來講去，做母親的總是捨不得，希望女兒知難而退，不要這麼固執，所以勸她：「女兒，我沒閒錢來支持你的勇敢唷！你要再等兩年畢業後找到工作才去刺青，好嗎？」
「錢的問題，你不用愁，我應徵上一家有名的大餐廳做服務生，暑假時就要去打工賺錢。」到現在，真的是「禾黃水落，飯熟火著」，講什麼都太慢了。
就這樣照著計劃一步一步來，有一天，膽大的女兒真的跑去刺青。那晚，母女倆視訊，問她「虐待」自己的背會痛苦嗎？她先傳一張背上才刺好龍鳳的照片給我看，還蒙著一層「保鮮膜」，那隻鳳凰的肉底一大片紅通通，女兒說：「我的背沒什麼肉，所以會比那些刺到大腿上或是屁股上的人痛很多。刺那條長尾龍的時候，還忍得住，等刺鳳凰的身體跟翅膀那時，因為手工精細，痛到受不了，就放聲大哭了！至少三天不能洗澡，晚上要趴著睡，一定還會痛到難以忍受。」
女兒從小動不動就哭得呼天喊地，不小心跌倒，只有膝蓋一點點破皮而已，就會哭到哇哇叫，實在想不通這麼怕痛的小女生，為何堅持一定要去刺青？
我想，忍痛在身上刺青，算是現代年輕人的一種流行。對待長大成人的子女，他們的想法、做法，我們做父母的，如果可以多去了解、體會、溝通，一定會比責罵、冷嘲熱諷還要好。
看更多《客新聞》https://hakkanews.tw/