文／呂秋蓉，桃園市平鎮區人，客語薪傳師，戴平鎮。感謝邱鴻春先生指導客語寫作（四縣腔）
打早𠊎兜坐遊覽車出發囉，車仔正上高速公路，歸車肚就像撳下歡喜模式。大家一片打嘴鼓、一片合唱熟事个歌仔，歌聲、笑聲頭前後背鬧熱煎煎，完全摎平常个疲勞擲淨淨。窗門外背景色倒退行，𠊎兜个心情嗄摎車仔共樣，緊來緊向往前，期待今晡日新社歡暢个遶尞。
頭站來到新社農會，有農民用心淰淰个香菇世界，有萋个到燥个、有創意加工餅仔、得人惜杏鮑菇人公仔，種類多到分人看著眼茫鼻花。香菇全係在地自家種自家賣，農民个面項寫等淳厚个笑容。佢兜熱情紹介自家種个菇，拶腹噴香。大家交關个毋單淨係食材，更加係一份支持小農，促進地方經濟个心。
離開香菇園地，續等去柑仔園摘柑仔。柑仔分日頭晟到金黃金黃，還靚哪！像一粒粒溫暖个細日頭，大家擐等籃仔穿梭柑仔樹下，一頭摘一頭食，酸甜酸甜在嘴肚散開，逐儕人都像番仔拈著錫樣仔，帶走好食个果子，也收集淰淰个快樂心情。
下一站𠊎兜來文心蘭園區，在日頭下跳等舞个黃色文心蘭當餳人看。園主當大方，分𠊎兜一儕人剪五叢帶轉去，派頭、優雅、色靚，像摎歸片黃金帶轉心肝肚、屋家肚。
下後去新社秘境—桃李河畔。跈等細崎仔散步，情人步道、石梯排景觀步道六角涼亭空氣新鮮，分人忍毋核深深唶一口大氣，一排排金黃楓樹，間等青里里仔个樹仔，細河壩肚水清清清，異多魚仔泅來泅去，像走相逐樣仔，靚到耐毋得，大家翕相、散步，尋自家中意个風景，接等食晝了，餐廳準備本地現摘个青菜、菇仔類，又脆又清甜，逐儕食到飽𩜰𩜰仔，每一口都有滿足摎幸福。
最尾，𠊎兜來到有深意个一福堂－象徵一生幸福，這位太陽餅盡有名。還有芋仔酥、黃梨酥、雞腳凍等，排到滿哪係，香味餳人，試食忒細阿姊再過切，正經開飯店毋驚人食，實在會做生理。一般人食了會敗勢，當自然就撈錢了，阿英講這𠊎老妹好食、阿玲姊講心臼好喫雞腳凍、阿成伯厥孫仔愛食黃梨酥，大家相賽買到袋仔尖起來，頭擺阿婆講个，人到貨到，大家都買到暢靂靂仔。
帶等香菇、柑仔、文心蘭、等路摎滿足个笑聲，摎這擺旅行畫下金黃色个完美句點，好尞好食，用實際行動支持農民，溫暖个回憶，這係歡喜、幸福个一日。
華語
一早我們坐遊覽車出發囉，車剛上高速公路，整車的人就像按下開心模式。大家一邊聊天、一邊合唱熟悉的歌曲，歌聲、笑聲前面後面熱鬧非凡，完全把平常的疲勞全甩乾淨。窗外景色往後移動，但我們心情和車子一樣，越來越向前行，期待今日新社愉悅之旅。
第一站來到新社農會，有農民用心滿滿的香菇世界，有新鮮到乾燥的、有創意加工餅乾、可愛的杏鮑菇公仔，種類多到讓人眼花撩亂。香菇全是在地自產自銷，農民臉上寫著樸實的笑容。他們熱情介紹自己栽種的菇類，紮實芳香。大家捧場的不僅是食材，更是一份支持小農，促進地方經濟的心。
離開香菇園地，接著去柑橘園採橘子。橘子被太陽曬到金光閃閃，好美啊！像一顆顆溫暖的小太陽，大家提著籃子穿梭於橘子樹下，一邊採一邊吃，酸甜滋味在嘴裡散開，每個人像意外收到天上掉下來禮物一樣驚喜，帶走好吃的橘子，也收集滿滿快樂心情。
下一站我們來文心蘭園區，在太陽下跳著舞的黃色文心蘭好迷人。老闆很大方，讓我們每人剪五株帶回家，歡樂、優雅、顏色美，像把整遍黃金帶入心裡、家中。
之後去新社秘境—桃李河畔。延著小山坡散步，情人步道、石階景觀步道六角涼亭空氣清新，讓人忍不住深深吸一大口氣。一排排黃金楓木，伴著翠綠樹木，小河溪流清澈見底，魚群游來游去，像在追逐賽跑一樣，美極了，大家拍照、漫步，找自己喜歡景色。接著午餐了，餐廳準備當地現採的青菜、菇類，又脆又清甜，每人吃到超飽，每一口都有滿足跟幸福。
最後，我們來到有寓意的一福堂－象徵一生幸福，這裡太陽餅很有名氣。還有芋頭酥、鳳梨酥、雞腳凍等，琳瑯滿目，香氣逼人，試吃品吃完小姐又再送來，真的是開飯店不怕人家吃，超會做生意。一般人吃了會不好意思，自然就掏錢買了，阿英說這我老妹愛食、阿玲姊說媳婦愛啃雞腳凍、阿成伯他的孫子愛吃鳳梨酥，大家狂買直到袋子都滿了，以前我祖母說，人到貨到，大家都買到不亦樂乎。
帶著香菇、橘子、文心蘭、伴手禮和滿足的笑聲，把這次旅行畫下金黃色的完美句點，好玩好吃，用實際行動支持農民，溫暖的回憶，這是高興、幸福的一天。
